N’na Kwetu

Diwani ya ushairi ya Kiswahili iliyoandikwa na Mohammed K. Ghassani, mshindi wa Tuzo ya Safal-Cornell. Tungo nyingi zilizomo humu ziliandikwa baina ya robo ya mwisho ya mwaka 2010 na nusu ya mwanzo ya mwaka 2015; miaka mitano ya kwanza ya mshairi kuhamia na kuishi nchini Ujerumani, mbali na nyumbani kwao Zanzibar. Ndani yake muna muakisiko wa hisia za mgeni ugenini, akitayamani mengi mazuri ya kwao na akijutia kuyaacha nyuma yake. Ukweli ni kuwa wakati mtu anapoishi ugenini, ndipo hasa ile thamani ya kwao anapoitambua na kutaka kujitambulisha nayo zaidi na zaidi. Kutoka kipembe cha mbali, Ghassani anakiangalia kwao na kuyaona mambo ambayo alipokuwamo ndani yake, alikuwa hata hajui kama yapo. Chembilecho Wajapani, samaki hajijui kuwa amerowa, kwani yeye mwenyewe anaishi ndani ya maji muda wote. Ghassani alizaliwa kisiwani mwaka 1977, alihamia Unguja 1996, na Ujerumani 2010.