Mungu Hakopeshwi

Riwaya ya Kiswahili iliyoandikwa na Zainab Alwi Baharoon, mzaliwa wa Mji Mkongwe Zanzibar. Riwaya hii ilishinda na kupewa Tuzo ya Mabati-Cornell ya Fasihi ya Afrika kwa mwaka 2018. Inaelezea maisha ya familia moja ya Unguja iliyoingia katika mitafaruku na mikasa mingi. Kila kitu huwa na chanzo na khatima, na hadithi inachunguza chanzo cha mitafaruku hiyo na khatima yake. Simulizi ni juu ya baba, Bw. Ahmed, mwenye hasira kali zisizo na mipaka, aliyeongoza familia yake kwa utashi wa nafsi yake, bila kujali hisia za mkewe wala wanawe. Moyoni mwake alihifadhi siri, na hiyo siri ndiyo iliyomfanya kuwa mkali bila kiasi, ikimsukuma azuie kurejea kwa yale yaliyomfika zamani. Lakini kivuli cha historia ya maisha yake ya nyuma hakikuacha kumuandama. Riwaya imeandikwa kwa lugha nzuri na fasaha ya Kiunguja, kwa ufundi wa msanii makini na mwelewa wa jamii za Kizanzibari.