Kale ya Washairi wa Pemba

Kale ya Pemba ni kale ya Waswahili na mazingira yao. Maandiko machache ya Abdurrahman Saggaf Alawy na Ali Abdala El Maawy yameonesha mazingira ya watu wa kale na mawazo yao. Si kale ya kabla ya Fumo Liyongo, bali kale ya Kamange na Sarahani, washairi wa karne ya kumi na tisa hadi karne ya ishirini ambao mashairi yao yalivuma pwani yote ya Afrika Mashariki. Mwandishi amefanikiwa kukusanya baadhi tu ya maandiko, yote yaliyoandikwa katika mtindo wa kale wenye kujali bahari, vina, mizani, na kibwagizo cha wazo moja. Kamange alipenda kutunga mashairi ya kujitoma, ya ushaha, ya utendaji na ukali wa mapenzi. Sarahani alipenda elimu na kusomesha, kuingia katika falsafa, na kutoa mawaidha. Diwani imehaririwa na Abdilatif Abdalla wa Mombasa, mshairi wa Sauti ya Dhiki, na inajumuisha lahaja za Kipemba, Kimvita, Kiamu, Kimrima, na Kivumba.