Wimbo wa Hatima

Riwaya ya Kiswahili iliyoandikwa na Isaac Ndolo, mshindi wa Tuzo ya Kiswahili ya Safal-Cornell ya Fasihi ya Afrika. Ndolo Kamala, kijana msomi na mtoto wa Chifu Uvunyu wa Matani, ambaye pia ni mrithi pekee wa kiti cha baba yake, anaungana na Elude, binti jasusi kutoka Uingereza mzaliwa wa Ufaransa, katika jukumu la kuhakikisha wanaharibu mpango wa Ujerumani wa kuzalisha silaha kali ya kibiolojia ya kufubaza ubongo na utambuzi wa binadamu (Pathojeni ya Upako) nchini Tanganyika. Silaha hii ingetumiwa na Ujerumani dhidi ya maadui zake wote wakati wa Vita vya Kwanza vya Dunia. Hata hivyo, wakiwa katikati ya jukumu lao, Kamala na Elude wanajikuta wakianguka ndani ya penzi, na tofauti zao za rangi na mila zinawafanya wote wawili waanze kutafakari hatima zao. Isaac Ndolo ni mwandishi wa lugha mbili, Kiswahili na Kiingereza, mhitimu wa Isimu mwenye Shahada ya Uzamili katika Utawala wa Umma kutoka Chuo Kikuu cha Moi, Kenya. Riwaya hii ni tafsiri yake ya riwaya yake ya The Song of Destiny (2021).