Gereza la Kifo

Riwaya ya Kiswahili iliyoandikwa na Hamisi Hussein Kibari, iliyoshinda Tuzo ya Taifa ya Mwalimu Nyerere ya Uandishi Bunifu. Akiwa hana kitu zaidi ya kalamu yake, mwandishi wa habari Walari Saire anaamua kupambana na mfumo kandamizi uliojaa rushwa, ufisadi, matumizi mabaya ya madaraka, na wizi wa rasilimali za nchi. Hatua hii inamweka katika hatari kubwa ya kupoteza maisha yake na ya familia yake. Hatimaye anafungwa kwa kubambikwa kesi. Pamoja na madhila anayopitia, huku watu wake wa karibu wakimwonya na kumtaka aache kufuatilia mambo ya wakubwa, Walari anaamua kutorudi nyuma. Lakini makubwa yanampata; anaanza kupoteza watu wake wa karibu sana. Ni yeye sasa, aamue kusuka ama kunyoa. Hamisi Hussein Kibari ni mtunzi wa riwaya na mashairi, mwandishi wa habari, mhariri, na mtengeneza filamu. Kwa karibu miaka 20 ameandika hadithi katika magazeti mbalimbali ya Tanzania na baadhi ya hadithi zake zimewekwa katika filamu. Ana shahada ya BA Education ya Chuo Kikuu cha Dar es Salaam.