Mfinyanzi Aingia Kasri

Wasifu wa Siti Binti Saad, mzaliwa wa Unguja, aliyejulikana kama Malkia wa Taarab. Umeandikwa na Nasra Mohamed Hilal. Wapenzi wa muziki wa Taarab wana deni kubwa kwa mwimbaji huyu maarufu ambaye, katika uhai wake na baadaye, aliuchukua muziki wa Taarab, akaupa sura mpya, akaubeba, na kuufikisha katika ngazi ya kimataifa. Licha ya kuwa waimbaji wengi wa Taarab wamekuja na kuondoka, hakuna ambaye amefikia kilele alichofika Siti Binti Saad. Hayati Shaaban Robert, ambaye naye alikuwa na kipaji cha pekee katika uwanja wa ushairi wa Kiswahili, alihusudu uimbaji wake na kushangilia maendeleo yake kiasi cha kuandika kitabu juu yake kiitwacho Wasifu wa Siti Binti Saad. Kitabu cha Nasra Mohamed Hilal ni wasifu wa kisasa wa Malkia huyu maarufu wa Taarab.